Oleh: Redaksi e-Newsletterdisdik | Juli 18, 2010

Nasehat Bundokanduang – Ka Gadih Gadang

Nasehat Bundokanduang – Ka Gadih Gadang

Oleh : Hayatun Nismah Rumzy

Hayatun Nismah Rumzy

Oii Upiak nan alah gadang. Kamarilah upiak malah duduak. Elok-elok juo kito badakek dakek. Eloklah kito ba ampiang ampiang, bia nak tahu dipadeh lado, nak tahu di masin garam, nak dapek paham jo mukasuik. Barundiang sapatah duo patah kato, nak masuak ka hati upiak. Dangakanlah pitaruah bundo. Upiak pacikkan arek arek dan pagang taguah taguah.

Tantangan ilmu urang basuami, pabaiak lakuan, pa elok  taratik. Jikok datang suami dari jauah, sambuiklah jo muko manih, hidangkanlah minum jo makannyo. Paliekkan muko nan janiah. Karajokan jo ati nan suci.  Kok barundiang samo gadang, kalamahannyo usah dibukakkan. Baa akal budi nan elok cako, tutuik dek upiak mati mati –  saangok jan maangok, saangin jan buliah lalu, parik paga dianak kanduang.

Kok bilo inyo datang talambek, kok inyo indak kunjuang pulang, jan lah maupek tantangan itu. Kana lah, kok inyo sadang sansaro, ridha jo saba nan dipaliekkan. Yakinlah Upiak , urang saba kasihan Allah. Kok maraso raso ado juo nan indak manyanangkan ati, lieklah  katiko inyo sadang suko,  katiko inyo sadang duduak surang. Ajaklah saketek bakucindan, sambia manyingguang jo kiasan.

Ciek lai … bundo katokan. Tantangan makanan jo minumannyo salalu handaknyo sadiokan dek upiak. Sagaleh aie minum paraguak rakungan, sabana manjadi ubek jariah palarai damam. Kok nasi jo samba alah tasaji baiak di ateh dulang atau di meja makan nan batutuik tuduang saji, saraso banalah inyo dianjuang dirumah tanggo.

Kok datang urang mananyoannyo katiko inyo sadang bajalan, bialah baduto upiak saketek – bia indak ado asuang jo pitonah nan ka manimpo. Ba ‘acaro urang dikampuang mangecekkan ” baru turun sabantako – alun jauah lai inyo pai bajalan “.

Kok  upiak nak pai ka pakan – mamintak izinlah dahulu bakeh inyo. Kok upiak naiak bendi – usahlah sabendi jo urang lain nan bukan dunsanak. Jiko sabendi jo urang lain basingguang kain samo kain. Ikolah pantangan urang tuo, mato palingan setan, ati palingan Allah, dek abih gali dek galitiak, hilang malu dek biaso. Kok padusi indak bamalu, jadi cacek saumua hiduik. Bak pintu indak bapasak, mudah rang maliang mamasukinyo. Bak parahu indak ba kamudi, biaso sasek dalam balayia.

Oh upiak sibiran tulang, pagang bana pituah Bundo ko. Buhua dalam kabek pinggang, buruak urang dek lakunyo. Kok roman nan indak dapek diubah – tapi kok laku jo parangai lai dapek ba ubah.

Kok basuo jo urang lain – kok duduak ditangah rami atau didalam alek jamu, caliak nan usah dipatinggi,  mato usah dipa ilia. Pandang sakali lalu sajo, usahlah galak dipabahak.

Lambak nan dari pado itu, sopan dan santun tak babateh, baso jo basi tak bahinggo, bia jo laki awak bana, janlah ilang baso basi. Di pamanih muluik sarato kucindan murah juo handaknyo. Gadangkan junjungan Upiak ditangah rami, muliakan inyo dimuko rapek.

Sakianlah dulu nasihaik bundo ko. Nak bahagia juolah upiak dunia akhirat. Nan manjadi juolah upiak beko ” keluarga sakinah ma waddhah warrahma.Amiien..

Sumber:  http://bundokanduang.wordpress.com/

Iklan

Responses

  1. mohon dibanyak artikel/curito/kaba/nasihat nan samacam iko BUNDO, buliah buyuang jo upiak ndak lupo jo caro iduik awak sahari-hari di tanah baradat ko bundo.
    kini caliak dek bundo..lah hilang kabau dek gubalo, hilang pusako dek pancarian, lah anyuik labu dek manyauak bundo.
    diakui atau tidak bundo, kini ko cupak lah dituka rang manggale, jalan di aliah urang lalu.
    dek rancak dendang tukang gandua, ameh batuka jo suaso. dek rancak datang kilek loyang, intan disangko kilek kaco…lah abih tandeh, kameh sado alhnyo bundo..ondeh mandeh bundooooooooooooooooooooooooo!!!


Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

Kategori

%d blogger menyukai ini: